CM Revanth Reddy: మహిళా పోలీసుల భాగస్వామ్యం పెంచేందుకు ప్రత్యేక అధ్యయనం- సీఎం ఎ. రేవంత్ రెడ్డి

CM Revanth Reddy: రాష్ట్ర పోలీసు శాఖలో మహిళల భాగస్వామ్యం, నాయకత్వాన్ని మరింతగా పెంచే దిశగా సీఎం ఎ. రేవంత్ రెడ్డి కీలక ఆదేశాలు జారీ చేశారు. మహిళా పోలీసుల నియామకాలు, శిక్షణ, కెరీర్ అవకాశాలు, పురోగతి వంటి అంశాలపై విస్తృత అధ్యయనం చేయాలని ఆయన పోలీసు ఉన్నతాధికారులకు సూచించారు. ఈ అధ్యయనంలో తమిళనాడు వంటి ఇతర రాష్ట్రాల్లో అమలవుతున్న పద్ధతులను పరిశీలించి, సమగ్ర నివేదిక సమర్పించాలని ఆదేశించారు.

సచివాలయంలో శుక్రవారం పోలీసు శాఖ ఉన్నతాధికారులతో జరిగిన సమీక్ష సమావేశంలో సీఎం ఈ విషయాలను స్పష్టం చేశారు. పోలీసు విభాగంలో మహిళల సంఖ్యను, వారి నాయకత్వ పాత్రలను బలోపేతం చేసేలా చర్యలు తీసుకోవాలని ఆయన పేర్కొన్నారు.

సమావేశంలో టీజీపీఏ డైరెక్టర్ అభిలాష్ బిస్త్ మహిళా పోలీసులకు సంబంధించి ముఖ్యమైన సూచనలు చేశారు. బందోబస్తు విధుల్లో ఉండే మహిళా పోలీసులకు తగినన్ని రెస్ట్ రూములు, మొబైల్ టాయిలెట్లు ఏర్పాటు చేయాలని, గస్తీ విధులకు స్కూటర్లు అందుబాటులో ఉంచాలని కోరారు. అలాగే, శాంతిభద్రతల బాధ్యతలున్న పోలీస్ స్టేషన్లకు మహిళా పోలీసులను ఎస్‌హెచ్‌వో (స్టేషన్ హౌస్ ఆఫీసర్)గా నియమించాలని సూచించారు.

ఈ సందర్భంగానే సీఎం రేవంత్ రెడ్డి, డీజీపీ శివధర్ రెడ్డితో కలిసి ‘ఫస్ట్ తెలంగాణ కాన్ఫరెన్స్ ఫర్ ఉమెన్ ఇన్ పోలీస్’ మరియు ‘ఆర్‌బీవీర్‌ఆర్ టీజీపీఏ యాన్యువల్ మేగజైన్-2025’ పుస్తకాన్ని ఆవిష్కరించారు.

సమావేశంలో విజిలెన్స్ డైరెక్టర్ జనరల్ శిఖా గోయెల్, అదనపు డీజీపీలు స్వాతి లక్రా, చారు సిన్హా, విజయ్ కుమార్, ఐపీఎస్ అధికారులు శ్వేత, రక్షిత మూర్తి, శిల్ప వల్లి తదితరులు పాల్గొన్నారు.

ఈ చర్యలతో తెలంగాణ పోలీసు శాఖలో మహిళల సాధికారత మరింత బలపడనుందని అధికార వర్గాలు భావిస్తున్నాయి.