Indian Economy : జపాన్‌ను దాటేసిన భారత్..ప్రపంచంలోనే 4వ అతిపెద్ద ఆర్థిక శక్తిగా టీమిండియా

Indian Economy : ప్రపంచ ఆర్థిక రంగంలో భారత్ సరికొత్త చరిత్ర సృష్టించింది. అగ్రరాజ్యాల సరసన చేరుతూ మన దేశం మరో మెట్టు పైకి ఎగబాకింది. జపాన్‌ను వెనక్కి నెట్టి, ప్రపంచంలోనే నాలుగో అతిపెద్ద ఆర్థిక వ్యవస్థగా భారత్ అవతరించిందని ప్రభుత్వం అధికారికంగా ప్రకటించింది. కేవలం ర్యాంకుల్లోనే కాదు, వృద్ధి రేటులో కూడా భారత్ దూసుకుపోతుండటం ఇప్పుడు ప్రపంచ దేశాల దృష్టిని ఆకర్షిస్తోంది.

భారత ఆర్థిక వ్యవస్థ పరిమాణం ప్రస్తుతం 4.18 ట్రిలియన్ అమెరికన్ డాలర్లకు చేరుకుంది. దీనితో ఇప్పటివరకు నాలుగో స్థానంలో ఉన్న జపాన్‌ను భారత్ అధిగమించింది. 2025-26 ఆర్థిక సంవత్సరం రెండో త్రైమాసికంలో భారత జీడీపీ ఏకంగా 8.2 శాతం వృద్ధిని నమోదు చేయడం విశేషం. ప్రపంచవ్యాప్తంగా వ్యాపార అనిశ్చితులు ఉన్నప్పటికీ, భారత్ తన పటిష్టమైన ఆర్థిక విధానాలతో ఈ ఘనత సాధించింది. ప్రస్తుతం అమెరికా మొదటి స్థానంలో ఉండగా, చైనా రెండో స్థానంలో, జర్మనీ మూడో స్థానంలో ఉన్నాయి.

భారత్ ఆగుతున్న సూచనలు ఎక్కడా కనిపించడం లేదు. రాబోయే రెండున్నర నుంచి మూడు ఏళ్లలో జర్మనీని కూడా వెనక్కి నెట్టి, మూడో స్థానానికి చేరుకోవడమే లక్ష్యంగా మన దేశం అడుగులు వేస్తోంది. 2030 నాటికి భారత జీడీపీ 7.3 ట్రిలియన్ డాలర్లకు చేరుకుంటుందని అంచనా. దేశీయంగా పెరిగిన వినియోగం, పటిష్టమైన ప్రైవేట్ రంగ పెట్టుబడులు ఈ వృద్ధికి ప్రధాన కారణాలుగా నిలుస్తున్నాయి. జీ-20 దేశాల్లోనే అత్యంత వేగంగా వృద్ధి చెందుతున్న దేశంగా భారత్ తన రికార్డును పదిలం చేసుకుంది.

భారత ఆర్థిక జోరును చూసి ప్రపంచ దిగ్గజ సంస్థలు తమ అంచనాలను సవరిస్తున్నాయి. వరల్డ్ బ్యాంక్ 2026లో భారత్ 6.5 శాతం వృద్ధి సాధిస్తుందని అంచనా వేయగా, మూడీస్, ఐఎంఎఫ్ కూడా భారత్ వృద్ధిపై పూర్తి ధీమా వ్యక్తం చేశాయి. ఏషియన్ డెవలప్‌మెంట్ బ్యాంక్ తన అంచనాలను 7.2 శాతానికి పెంచింది. ఫిచ్ రేటింగ్స్ ప్రకారం వినియోగదారుల డిమాండ్ బలంగా ఉండటంతో భారత్ మున్ముందు మరిన్ని రికార్డులను సృష్టించబోతోంది. ఇది కేవలం అంకెలే కాదు దేశంలోని ప్రతి ఒక్క సామాన్యుడికి గర్వకారణమైన విషయం.